ချင်းတောင်ပေါ်မြို့အချို့တွင် အခြေခံသင်ရိုးညွှန်းတမ်းအဖြစ် အသုံးပြုခဲ့သော ချင်းတိုင်းရင်းသား ဖတ်စာအုပ်များကို ကွန်ပျူတာဆော့ဖ်ဝဲဖြင့်
ဖန်တီးထားသော အသံအရုပ်ပါ Zolaisinna (ချင်းသင်ခန်းစာ) ဆော့ဖ်ဝဲကို အောက်တိုဘာလကုန်တွင် ရေးဆွဲလိုက်နိုင်ကြောင်း ဖန်တီးသူ
ချင်းတိုင်းရင်းသားကျင့်ဆွင်းကပ်က ပြောသည်။
ချင်းတောင်ပေါ်မြို့များဖြစ်သော တီးတိန်၊ တွန်းဇံနှင့် ဂျီခါး မြို့တို့တွင် အများဆုံးအသုံးပြုသည့် ဇိုလိုင်ဘာသာစကားကို အခြေခံ၍ ပြုစုထားသော
သူငယ်တန်းမှ စတုတ္တတန်းထိ သင်ရိုးညွှန်းတမ်းများကို အရုပ်နှင့်အသံပါ ထည့်သွင်းပေးထားသည်။
ထိုကြောင့် လတ်တလောတွင်ဇိုလိုင်
ဘာသာစကား တစ်မျိုးတည်းသာ ထည့်သွင်းထားသည့်အတွက် ချင်းတိုင်းရင်းသားများအတွက်သာ လေ့လာရလွယ်ကူပြီး မြေပြန့်သားများ လေ့လာနိုင်ရန်အတွက်မူ အခက်အခဲရှိဦးမည်ဖြစ်ကြောင်း ကိုကျင့်ဆွင်းကပ်က ပြောသည်။
“ကျွန်တော်တို့ ချင်းတွေဟာ နိုင်ငံတကာမှာ ပျံ့နှံ့နေတဲ့အတွက် အခုနောက်ပိုင်း မျိုးဆက်တွေဆို ကိုယ့်ဘာသာစကားကို သေချာ မတတ်တော့တာကြောင့်
ဒီဆော့ဖ်ဝဲကို တီထွင်တာပါ။ ကျွန်တော်တို့ ချင်းတွေမှာ ဘုံစကားလည်းမရှိတော့ တကယ်လို့ ပြည်ထောင်စုအဆင့်ကနေ ချင်းမြို့တစ်မြို့မြို့က
ပြောတဲ့စကားကို ဘုံစကားလုပ်လိုက်ရင် ကိုယ့်စာနဲ့စကားတွေကို မပျောက်ပျက်စေချင်တဲ့ အတွက်ပါ” ဟု ၄င်းက ထပ်မံ ပြောကြားသည်။
ချင်းစာသင်ခန်းစာဆော့ဖ်ဝဲ တွင် Alphabet စာလုံးများကို အသုံးပြုထားခြင်းဖြစ်ပြီး သင်ခန်းစာဖတ်စာအုပ်များမှာ ၁၉၇၂ မှ ၁၉၉၆ ခုနှစ်အထိ ချင်းတိုင်းရင်းသားအစိုးရပညာရေးဝန်ထမ်း အချို့က လေ့လာပြုစုကာ ချင်းတောင်ပေါ်ရှိ အစိုးရမူလတန်းကျောင်းများတွင် သင်ကြားပေးခဲ့သော ဖတ်စာအုပ်များဖြစ်ကြောင်း ဆော့ဖ်ဝဲတီထွင်သူ ကိုကျင့်ဆွင်းကပ်က ပြောသည်။
အဆိုပါ ချင်းစာသင်ခန်းစာ ဆော့ဖ်ဝဲကို စီးပွားဖြစ်ရောင်းချမည်မဟုတ်ဘဲ စိတ်ဝင်စားလေ့လာလိုပါက ဖုန်းနံပါတ် ၀၉၄၅ ၀၀-၆၁၃၁၅ သို့
ဆက်သွယ်မှာယူနိုင်သည်ဟု ဆိုသည်။
ယင်းဆော့ဖ်ဝဲကို တီထွင်သူ ကိုကျင့်ဆွင်းကပ်မှာ ၂၀၁၀ ခုနှစ်ကလည်း ပြည်တွင်းရှိ နည်းပညာ ကုမ္ပဏီတစ်ခုနှင့် ပူးပေါင်း၍ ဇိုလိုင်ဘာသာစကားအား အင်္ဂလိပ်၊ မြန်မာ နှစ်ဘာသာသို့ ပြန်ဆိုထားသော အီလက်ထရွန်နစ် အဘိဓာန်ကို တီထွင်ထုတ်လုပ်ခဲ့သူလည်းဖြစ်သည်။
No comments:
Post a Comment