နိုဝင်ဘာ ၃ ရက်နေ့တွင် လူကြီးမင်းဖုန်းဆိုင်များတွင်ပြုလုပ်မည့် Samsung Galaxy Mini ဟန်းဆက်များအား မဲနှိုက်ကာ ၅၀၀၀ကျပ်ဖြင့် ရောင်းချပေးမည့်အစီအစဉ်ကို လုံခြုံရေးအခြေအနေအရ ရပ်ဆိုင်းလိုက်ရကြောင်းသိရသည်။
လူကြီးမင်းဖုန်းဆိုင်မှ အထွေထွေမန်နေဂျာ ဦးကိုကိုအောင်က ''ကျွန်တော်တို့ ဒီနေ့ မနက် အစီအစဉ်ကို လုံခြုံရေးအခြေအနေကြောင့် ဖျက်လိုက်တယ်။ လူမနိုင်လို့ ဖျက်လိုက်ရတာပါ။ နောက်ပိုင်းကျရင် ဒီအစီအစဉ်ကို ပြန်လုပ်ဖို့ ရှိပါတယ်။''ဟု Eleven Media Group သို့ နိုဝင်ဘာလ ၃ ရက် (ယနေ့) နံနက်ပိုင်းက ပြောကြားခဲ့သည်။
''စီစဉ်ထားတဲ့အတိုင်း ရောင်းပေးဖို့အဆင်မပြေတော့ပါဘူး။ ဆိုင်တွေကိုလည်း
လုံခြုံရေးအခြေအနေအရ ပိတ်ထားရတယ်။ Customer တွေကိုလည်း အနူးအညွတ် တောင်းပန်ပါတယ်။'' ဟု လူကြီးမင်းဖုန်းဆိုင်မှ တာဝန်ရှိသူက ပြောကြားခဲ့သည်။
''ပဲခူးကနေ နံနက် ၄ နာရီတည်းက လာရတာပါ။ ဒီကိုရောက်တော့ နံနက် ၇နာရီလောက်ရှိပြီ။ သူငယ်ချင်း တစ်ယောက်နဲ့အတူ လာတာပါ။ အလုပ်ပျက်အကိုင်ပျက်ဖြစ်တာပဲအဖတ်တင်တယ်။ ကျွန်တော့်လိုပဲ အဝေးကြီးကနေလာတဲ့သူတွေ အများကြီးတွေ့ရတယ်''ဟု လူကြီးမင်း(လသာ)ဖုန်းဆိုင်သို့ ပဲခူးမြို့မှလာရောက်သူတစ်ဦးက ပြောပြခဲ့သည်။
''နံနက် ၆ နာရီလောက်တည်းက ဒီကိုရောက်နေတာပါ။ တောင်ဥကလာပကနေလာတာပါ။ အဲဒီအချိန်လောက် က ဒီလောက်လူမများသေးဘူး။တဖြည်းဖြည်းနဲ့လူများလာပြီး ထိန်းမနိုင်သိမ်းမရတွေဖြစ်လာတယ်။တန်းစီခိုင်းလည်းမရတော့ဘူး။ ရှေ့မှာရောက်နေတဲ့သူတွေက နောက်မဆုတ် ပေးချင်ကြဘူးလေ''ဟု တောင်ဥက္ကလာပမှ လာရောက်သူတစ်ဦးကပြောပြခဲ့သည်။
နံနက် ၈ နာရီခွဲနှင့် ၉ နာရီကြားတွင် ကူပွန်များဝေရန် တန်းစီခိုင်းသော်လည်း အဆင်မပြေဖြစ်ခဲ့ကြောင်း၊ ကူပွန်များကို ပစ်ကြဲပြီးဝေခဲ့သေးကြောင်း၊ ထို့နောက် များပြားသောလူအုပ်ကြောင့် ထိန်းသိမ်းရခက်ကာ အစီအစဉ်ကိုဖျက်သိမ်းကြောင်း ကြေညာခဲ့ကြောင်း၊
လူအုပ်အတွင်းမှ လူအချို့မှာ ဆိုင်ကိုခဲများဖြင့်ပစ် ပေါက်ခြင်း၊ ဆိုင်တံခါးကိုထုရိုက်ခြင်းများ ပြုလုပ်ခဲ့ကြကြောင်း၊ လုံခြုံရေးတာဝန်ရှိသူများ လာရောက်ထိန်းသိမ်းရကြောင်း၊ လာရောက်သူအချို့မှာ မိမိတို့၏ ဟန်းဖုန်းများ ပျောက်ဆုံးခြင်း၊ ပိုက်ဆံများ ပျောက်ဆုံးခြင်း ရှိခဲ့ကြောင်းလည်းသိရသည်။ ထို့ပြင် လူကြီးမင်း(လသာ) ဖုန်းဆိုင်အနီးရှိ မိုဘိုင်းဖုန်းအရောင်းဆိုင်အချို့မှာလည်း ဆိုင်ပိတ်ထားရကြောင်း တွေ့ရှိရသည်။
Eleven Media Group
No comments:
Post a Comment